لو ابنك مش بيسمع كلامك ...يبقى المشكلة فى العلاقة و التواصل مابينكوا ... 80 % من التربية ..هى تواصل ...
طيب ازى نبنى علاقة قوية و متينة مع اولادنا و يسمعوا كلامنا ؟؟؟
- افضل حاجة هى الوقت المخصص او special time ...
- ازى بقى نعمل وقت مخصص للاولاد ...انا بلعب معاهم لما الاقى وقت فاضى . اية تانى المطلوب ؟؟؟
- لا الوقت المخصص دة حاجة كدة تانية خالص ... دة وقت بميعاد مسبق و معلن ...متفقين علية زى انهاردة الساعة 8 الصبح هنعمل وقت مخصص مع بعض ....
- هو انا فاضية ... أدى اولادى مواعيد ..!!!
- عشر دقايق كل يوم بس لكل طفل لوحده و اظبطيهم على المنبه و لما يرن يكون خلاص الوقت خلص و شوفى اللى وراكى بعدها ...كتير عشر دقايق على ابنك او بنتك ؟؟
- طيب يعنى هلعب عشر دقايق ... ماشى العبهم مسابقة الترتيب ...
- حبيبتى العشر دقائق دول بتوع ابنك يكون فيهم الملك فى اختيار تلعبوا اية و تقولوا اية فى حدود الامان و تكونى صديقة حلوة و عسولة مش ماما تقول وضب ..نظم ... بلاش بهدله ... بالعكس اصحاب بنلعب مع بعض .. تتفقى معاه و تقولى له....حبيبى احنا هنعمل special time لمدة عشر دقائق ...و انت هتختار نلعب اية فيهم و اول ما يرن المنبه ..هاديك حضن كبير و نلم اللعب و نستنى لبكرة لل special time بتاع بكرة ان شاء الله ...
- يعنى كدة هيسمع كلامى ؟؟
- كدة هتبنى علاقة حب و أمان ... كدة ابنك هيستنى الوقت علشان يتكلم معاكى .... هيحس انه مهم فى حياتك ... و بالتالى انتى كمان تكونى مهمه جدا فى حياته
- ما انا بعمل كل حاجة لهم و بعدين انا عندى تلات اولاد ... هاقعد مع كل واحد لوحدة ...ازى يعنى؟؟
-ايوة فعلا ...انت بتبذلى اقصى ما عندك علشان اولادك ..بس ساعات زحمة الحياة و الالتزامات بتخلى اولادنا علطول شايفنا مشغولين عنهم ...حتى وقت ما احنا معاهم ..ماسكين التليفون او بنشتغل ... ما تنسيش فى العشر دقائق special time تقفلى الموبيل علشان تركيزك يكون مع ابنك 100 %...
-و اولادى التانين اعمل ايه معاهم ؟؟
-اشغليهم فى حاجة لحد ما يعرفوا ان كل واحد فيهم هياخد وقته و يثقوا فعلا انك هتلعبى مع كل واحد لوحده ...
- طيب انا عملت ال special time ...و لما رن المنبه ...ابنى عيط جامد جدا و عايز اللعب تانى ..
- طبيعى جدا لو مبسوط هيعوز اكتر لعب ... احضنيه ساعتها و قولى له بكرة ان شاء الله انت شكلك كنت مبسوط و الوقت خلاص خلص ممكن بكرة نزود الوقت شوية ... و ممكن تزويدى الوقت شوية لو تحبى خليها ربع ساعة مثلا بس تانى يوم .... المهم الاستمرار و بعد عشر ايام لعب هتلاقى الفرق بجد ..هتلاقى انك عايزة special time اكتر منهم ... هيثقوا فيك و يقولوا لك اسرارهم و يسمعوا كلامك ...بس بلاش تخلى الوقت دة وقت للضغط عليهم و تهدديهم انكوا لو مش بتتصرفوا كويس مافيش لعب ...بلاش كدة ..عايزن حب مش تهديد ...
- تمام طيب لو مراهق ؟؟
- فى وقت مقترح لل special time
من 2 الى 7 سنوات ... عشر دقايق يوميا
من 7 الى 10 سنوات ...نص ساعة اسبوعيا
فوق 10 سنوات ..مراهقة يعنى ..مرة فى الشهر ...
طبعا لو مراهق الوقت المخصص مهم اوى . ... فكرى فى حاجة المراهق بيحبها اوى اوى و مرة فى الشهر تكفى المراهق ....
